Сурет: Абай облысы ПД

Абай облысының Чекоман ауылында 12 қаңтарда жоғалып кеткен 8 жастағы Райян есімді бала аман-есен табылды. Бала құдықтың ішінде шамамен алты сағат бойы отырған, деп хабарлайды Oimaqmedia.kz.

Баланың соңғы рет сағат 14:30 шамасында көшеде көрілгені белгілі болды. Іздеу жұмыстарына ауыл тұрғындары, полиция қызметкерлері және жергілікті атқарушы орган өкілдері жұмылдырылды. Жедел әрекет ету барысында бейнебақылау камераларының жазбалары пайдаланылып, баланың жүрген бағыты анықталды.

Полиция мәліметінше, ұсталмаған бетон плитаның тесігі арқылы бала құдыққа абайсызда құлап кеткен және онда бірнеше сағат бойы шамамен алты сағат бойы отырған. Ақпаратқа сәйкес, құдықтан оны құтқарушылар қауіпсіз күйде алып шықты. Медициналық көмек көрсетуді қажет етпеген.

Баланың анасы іздеу жұмыстарында көмектескен жандарға алғыс білдірді. Полиция мен ауыл әкімдігі бейнебақылау жүйелерінің мұндай жағдайларды жылдам анықтауда маңызды рөл атқаратынын атап өтті.